Untitled

 

Kung ibig mo akong makilala,
 lampasan mo ang guhit ng mahugis na balat,
 ang titig kong dagat—
 yumayapos nang mahigpit sa bawat saglit
 ng kahapon ko’t bukas.
 
Kung ibig mo akong makilala
 sunduin mo ako sa himlayang dilim
 at sa madlang pagsukol ng inunang hilahil,
 ibangon ako at saka palayain.
 
Isang pag-ibig na lipos ng lingap,
 tahanang malaya sa pangamba at sumbat
 may suhay ng tuwa’t ang kaluwalhatia’y
 walang takda—
 ialay mo lahat ito sa akin
 kung mahal mo ako’t ibig kilalanin.
 
Kung ibig mo akong kilalanin,
 sisirin mo ako hanggang buto,
 liparin mo ako hanggang utak,
 umilanlang ka hanggang kaluluwa—
 hubad ako roon: mula ulo hanggang paa.
 
Ruth Elynia S. Mabanglo

Stumbled upon this beautiful poem from a friend’s Multiply page.  Wala lang, ang ganda kasi, that’s why I thought of posting it here.  Hope you won’t mind, Peewee! Where did you get it, anyway?! And what’ s the title? ;o)